SEI PROIEKTU ESTRATEGIKO MUGAZ GAINDIKO LANKIDETZA INDARTZEKO: INBERTSIOA ENPLEGUAN, MUGIKORTASUNEAN ETA ELEANIZTASUNEAN

AFOMEFeko gobernantza-organoko ordezkari politikoek AFOMEF POCTEFA 2021-2027 deialdiaren esparruan hautatutako sei proiektuak: LANEAN, MUGAZIKLO, TRANSFERMUGI, SAREBIDE, EUSGUNEAK eta HEZHI, aurkeztu dituzte gaur goizean, Iruñeko Nafarroako Jauregian. Ekimen horiek 14,8 milioi euroko finantzaketa jasoko dute Europako EGEF funtsetatik, eta horrek 23 milioi euro inguruko guztirako inbertsioa ekarriko du inplikatutako lurraldeetan. INTERREG VI-A Espainia-Frantzia-Andorra (POCTEFA 2021-2027) programak garapen jasangarria eta eskualde kohesioa indartzeko mugaz gaindiko lankidetza bultzatzen du. Fase berri honetan, “Herritarrengandik hurbilago dagoen Europara” lortzeko 5. helburu politikoaren bidez, EGEF funtsen lurraldetzea indartu nahi da eremu funtzionaletan edo “bizi arroetan” tokiko ekimenak sustatuz. Ildo horretan, eremu horiek Europako lurralde-politikako benetako berrikuntza-laborategi bihurtzen dira, non herritarren bizi-kalitatea hobetzea den helburu nagusia, horretarako bertako lurraldeen behar espezifikoetara egokitutako ekintzak abiaraziz.

Akitania Berria Euskadi Nafarroa Euroeskualdeak, Mendebaldeko Eremu Funtzionalaren garapena eta bultzada koordinatzeaz arduratzen denak antolatu du ekitaldia. Eremu hori POCTEFA programak definitutako bost eremu funtzionaletako bat da, eta Euskadi, Nafarroa eta Akitania Berria eskualdearen hegoaldeko lurraldea biltzen ditu, itsasertzetik Biarnoko Baretus haraneraino. Europako programak funtsezko eragiketa estrategiko gisa identifikatzen ditu gisa horretako “eremuak funtzionalak”, non lurralde-estrategia integratuak ezartzen diren. Gure mugan aurrekaririk ez duen ekimen berritzailea da, mugaz gaindiko lankidetza indartzea eta mugako lurraldeen garapen jasangarria sustatzea helburu duena.

Hautatutako sei proiektuak bat datoz AFOMEF Lurralde Estrategia Integratuaren 3 ardatz estrategikoekin (enplegua, mugikortasuna eta eleaniztasuna) eta INTERREG POCTEFA programaren 5. Helburu Politikoarekin. Estrategia hori mugaz gaindiko herritarrekin lankidetzan egin zen, 200 herritar baino gehiago eta tokiko aktoreak inplikatu zituen partaidetza-prozesu baten ondoren, goranzko ikuspegiari jarraituz (bottom-up). Estrategia ofizialki 2023ko abenduan abiarazi zen.

Valeria Cenacchi, Europako Batzordeko INTERREG POCTEFA Desk Officer-aren hitzetan: “Lurralde-estrategia hauen gakoa mugaz gaindiko bizi-eremua irudikatzeko duten gaitasunean datza, tokiko eragileak proiektu zehatz eta jasangarrietara lotzen baititu. Proiektuok tokiko aberastasuna balioan jartzen dute, herritarren eguneroko erronkei erantzuten diete eta mugaren eragin negatiboak arintzen laguntzen dute. Mendabaldeko Eremu Funtzionalaren (AFOMEF) baitan hautaturiko mugikortasun, enplegu, eta eleaniztasun proiektuek elkarri lagunduko diote, eta, hala, tokiko erakargarritasuna, erresilientzia eta lurralde-kohesioa indartuko dute. Azken finean, Europar hiritartasuna tokiko guneetan hedatzea ahalbidetuko dute."

Honako hauek parte hartu dute komunikabideentzako aurkezpen-saioan:

• Ana Ollo, bigarren lehendakariordea eta Nafarroako Gobernuko Memoria eta Bizikidetzako, Kanpo Ekintzako eta Euskarako kontseilaria.
• Mathieu Bergé, Akitania Berriko eskualdeko kontseilaria, Euroeskualdeko, Mugaz Gaindiko Lankidetzako eta Portu eta Aireportuetako ordezkaria.
• Mikel Anton, Eusko Jaurlaritzako Europako Gaien Zuzendaria
• Joseba Erremundeguy, Euskal Herriko Hirigune Elkargoko Mugaz Gaindiko, Europako eta Nazioarteko Lankidetzarako kontseilaria.
• Jean-Pierre Mirande, Mendi Politikez eta Mugaz Gaindiko Lankidetzaz arduratzen den presidenteordea, Mendi Plangintzako ordezkaria eta Pirinio Atlantikoetako Departamentu Kontseiluak Nafarroarekin dituen Harremanetarako ordezkaria.
• Iker Goiria, Mugazgaindiko Lankidetzarako Arduraduna, Gipuzkoako Foru Aldundia. Diputatu Nagusiaren Kabinetea

Denen ustetan Europako AFOMEF baliabide berria aukera baliotsua da POCTEFAren EGEF funtsak lurralderatzeko, perimetro txikiagoetan eta tokiko beharretara egokituta lan egitea ahalbidetuko baitu. Baliabide honen ondorioz, AFOMEF lurraldean sei proiektu egituratzaile garatuko dira, eta proiektu horiek eragin zuzena eta esanguratsua izango dute mugaren bi aldeetako lurraldeen garapenean eta integrazioan.